no_bannerno_banner

პეტრე მამრაძე - რუსეთში კატასტროფული ვითარებაა ეკონომიკის, დემოგრაფიის თუ სხვა მხრივ

პეტრე მამრაძერუსეთთან ზედმეტად დაახლოებული პოლიტიკოსის, ზურაბ ნოღაიდელის ყოფილი თანაგუნდელი და თანამოაზრე პუტინს ლანძღავს. პეტრე მამრაძემ, რომელიც პარლამენტში უპარტიო დეპუტატებისგან შემდგარი ფრაქციის წევრია, რუსეთს primetimenews-თან საუბარში ოკუპანტი უწოდა და განაცხადა, რომ ამას ჯერ კიდევ 1992 წლიდან ამბობდა.

რამდენიმე დღის წინ რუსეთის საგარეო საქმეთა მინისტრმა სერგეი ლავროვმა გააკეთა განცხადება იმის შესახებ, რომ რუსეთი საქართველოსთან დიპლომატიურ ურთიერთობებს მხოლოდ იმ შემთხვევაში აღადგენს, თუ "საქართველოს კანონი ოკუპირებული ტერიტორიების სტატუსის" შესახებ გადაიხედება. ამ განცხადებასთან და ზოგადად საქართველოს პრეზიდენტის ინიციატივასთან დაკავშირებით ჩვენ პეტრე მამრაძის შეფასებით დავინტერესდით.

პეტრე მამრაძე: ბოლო დროს ბევრი ითქვა და დაიწერა დასავლელი პოლიტოლოგების მიერაც, რომ სააკაშვილი იდეალურად აწყობს პუტინის რეჟიმს და რომ პუტინის რეჟიმი მანიპულირებს სააკაშვილით. სწორედ ამ კუთხიდან უნდა შევხედოთ მოვლენებს, მათ შორის ლავროვის განცხადებასაც და სააკაშვილის გადაწყვეტილებას. ამის შედეგი არის ის, რომ გაუცხოვება ხდება აფხაზებს, სამხრეთ ოსეთის მოსახლეობას და დანარჩენ საქართველოს შორის. ევროპული თანამეგობრობის წევრებმა არაერთხელ აღნიშნეს, რომ რკინის ფარდაში საქართველო დამნაშავეა არანაკლებად, ვიდრე რუსეთი.

- ლავროვი კიდევ ერთხელ იხსენებს 2008 წლის ომს და მასზე პასუხისმგებლობას კვლავ საქართველოს აკისრებს. ეს წინააღმდეგობაში მოდის მედვედევის განცხადებასთან, რომელმაც აღიარა, რომ საქართველოსთან ომი რუსეთმა დაიწყო იმის გამო, რომ მისი ნატოსთან დაახლოება შეეჩერებინა. რატომ კეთდება მსგავსი ურთიერთგამომრიცხავი განცხადებები?

- საქმე ისაა, რომ ნამდვილი ვითარება სულ სხვაა. სააკაშვილმა ლანგარზე მიართვა რუსეთის პოლიტიკურ მანქანას იმის საბაბი და მიზეზი, რომ შემოსულიყვნენ საქართველოში, დაეპყროთ აფხაზეთი და სამხრეთ ოსეთი, გაეშენებინათ იქ თავიანთი ბაზები და გამოეცხადებინათ აფხაზეთისა და სამხრეთ ოსეთის დამოუკიდებლობა. მედვედევმა განცხადება ახლა კი არ გააკეთა, არამედ ჯერ კიდევ 2008 წელს. ის, რომ თბილისთან 30 კმ-ში იდგა რუსის ტანკი სააკაშვილის ავანტიურისტული მოქმედების შედეგი იყო. ეს მანიპულირებული იყო პუტინის რეჟიმის მიერ. ეს პროცესები გრძელდება.

- საქართველოს ორ რეგიონში დღესაც დგას რუსეთის ჯარი, ამ პირობებში თქვენ არ მიიჩნევთ რუსეთს ოკუპანტად?

- 1992 წლიდან რეგულარულად ვაცხადებ იმას, რომ ეს არის ოკუპაცია. იქ რომ სამშვიდობოები იდგნენ ეს რეალურად იყო ჯარი, რომელიც სადემარკაციო ხაზს ავლებდა ამ რეგიონებსა და დანარჩენ საქართველოს შორის. სააკაშვილმა, მანიპულირებულმა პუტინისა და მისი გარემოცვის მიერ, ლანგარზე მიართვა მათ შესაძლებლობა, რომ აეღოთ კოდორის ხეობა, რაც მესამედია აფხაზეთის ტერიტორიისა. გარდა ამისა, აეღოთ ახალგორი და ქსნის ხეობა, რომელიც არასდროს მონაწილეობდა კონფლიქტში და როგორც აფხაზებს არ ჰქონდათ კოდორის ხეობაზე პრეტენზია, ასევე არ ჰქონდა რუსეთს ახალგორსა და ქსნის ხეობაზე. გაიხსენეთ სარკოზის განცხადება: ადგილი ჰქონდა სამხედრო ინტერვენციას სააკაშვილის მხრიდან, რასაც რუსეთმა უპასუხა გადაჭარბებული მოქმედებით. მე ამ გადაჭარბებულ მოქმედებას ოკუპაციას ვეძახი.

- თუ ეს არის ოკუპაცია, მაშინ რამდენად ლეგიტიმურია ლავროვის მოთხოვნა ოკუპირებული ტერიტორიების შესახებ კანონის გაუქმებაზე?

- ამით ისევ გრძელდება სააკაშვილის მანიპულირება. მათ კარგად იციან, რომ სააკაშვილის მხრიდან ეს გამოიწვევს აგრესიულ ნაბიჯებს. ეს აგრესია აწყობთ იმისთვის, რომ დიალოგი არ დაიწყოს ქართველებსა და აფხაზებს, თუ ოსებს შორის. ეს რკინის ფარდა მათ შესანიშნავად აწყობთ და სააკაშვილს საკუთარი ხელით აშენებინებენ მას. ვისაც ეჭვი ეპარება იმაში, რომ სააკაშვილი მანიპულირებადია რუსეთის მიერ, გაიხსენოს ენგურჰესთან დაკავშირებული საიდუმლო მემორანდუმი, რომელსაც სააკაშვილმა ხელი მოაწერა 2008 წლის დეკემბერში. აქ მთავარი არის არა ის, რომ ხელი მოაწერა, სხვანაირად ენგურჰესს ვკარგავდით, არამედ ის, რომ საიდუმლო გახადა. ოკუპანტმა იცის რას აწერს ხელს და ქართველმა ხალხმა არ იცის რას მოაწერა ხელი პრეზიდენტმა. გარდა ამისა, გაიხსენეთ ვის ხელშია ძირითადი ობიექტები. გაიხსენეთ ალექსანდროვის განცხადება შარშან 26 მაისის წინ: სააკაშვილი საქართველოში ნებისმიერ პრესინგს გაუძლებს, რადგან იდეალურად აწყობს პუტინს და მის გარემოცვას.

- მაშინ რას ნიშნავს რუსეთის ხელისუფლების განცხადებები, რომ პრობლემა აქვს სწორედ საქართველოს ხელისუფლებასთან და არა ქართველ ხალხთან?

- ეს ელემენტარულია. ეს ხომ პიარია. პუტინს და მის რეჟიმს ჰაერივით სჭირდება მტრის ხატი. რუსეთში კატასტროფული ვითარებაა ეკონომიკის, დემოგრაფიის თუ სხვა მხრივ. ამ ფონზე ერთადერთი, რაც აქვთ, არის ის, რომ "პატრიოტები" არიან და ებრძვიან ამერიკას, ნატოს, სააკაშვილის სახით. თავის მხრივ, სააკაშვილსაც აწყობს ეს პიარისთვის. გაიხსენეთ, როგორ დააბრუნა სააკაშვილმა რუსის ჯარი 2008 წლის 11 დეკემბერს პერევში. მე კარგა ხანია ჩვენ საზოგადოებაში არ შემხვედრია საღად მოაზროვნე ადამიანები, არც ერთი სოციალური ჯგუფიდან, ვისაც ეჭვი ეპარება იმაში, რომ სააკაშვილი ბოლომდე მართულია რუსეთის მიერ. ეს დე ვაალმაც დაწერა, კავკასიის ამ უბადლო ექსპერტმა.

- რას გეუბნებათ ის ფაქტი, რომ რუსეთის პრეზიდენტი უკვე მესამედ გახდა ვლადიმერ პუტინი? რა შეიძლება მოხდეს მომდევნო 6 წლის განმავლობაში?

- მინდა შეგახსენოთ, რაც ყველამ იცის, რომ პუტინი რჩებოდა რუსეთის ერთპიროვნულ მმართველად. ექსპერტები ტყუილად არ უწოდებენ მის მმართველობას ერთგვარ გადაგვარებულ თვითმფლობელობას. მაშინაც, როცა ნომინალურად მედვედევი იყო რუსეთის პრეზიდენტი და პუტინი ვითომ პრემიერი, მთელი რეალური ძალაუფლება ამ უკანასკნელის ხელში რჩებოდა. საგულისხმოა, რომ მას ამისთვის კონსტიტუციის შეცვლა არ დასჭირდა. მსოფლიო ექსპერტების აზრით, რუსეთში იმდენად სავალალო მდგომარეობაა მისი ამ 12-წლიანი მმართველობის შედეგად, რომ ის უსათუოდ შეხვდება უდიდეს პრობლემებს ქვეყნის შიგნით.

- საქართველოს შიდა პოლიტიკაზე რომ ვისაუბროთ, თქვენი აზრით, როგორ მიმდინარეობს მოვლენები და რა მოიტანა ბიძინა ივანიშვილის გამოჩენამ?

- ივანიშვილის მოსვლას უაღრესად დადებითად ვაფასებ. მას პირადად ვიცნობ და მინდა ვთქვა ის, რაც ყველამ იცის. ეს არის უდიდესი ქველმოქმედი საქართველოს ისტორიაში. ჩვენთვის ლეგენდებად იქცა ძმები ზუბალაშვილების სახელები, სარაჯიშვილის სახელი, მაგრამ ბიძინა ივანიშვილი ყველაზე დიდია ქველმოქმედების მასშტაბით, ვინც კი საქართველოს ოდესმე ჰყოლია. ძალიან საინტერესო ვითარებაა, საქართველოს ისტორიაში უდიდესი ქველმოქმედი, რომელმაც სხვაგან ნაშოვნი უდიდესი ფული დაახარჯა ქართულ საზოგადოებას, დაუპირისპირდა სააკაშვილის ხაზინების ქურდების რეჟიმს. იმას, რაც საქართველოში ხდება, ჰქვია ავტოკრატული კლეპტოკრატია. შემთხვევითი არ არის, რომ უცხოელი დიპლომატები, რომლებიც ბიძინა ივანიშვილს შეხვდნენ, ამბობენ, ვაცლავ ჰაველს გვაგონებსო. მასაც არ ჰქონდა თავიდან პოლიტიკური გამოცდილება, მაგრამ მის მხარეზე იყო მორალური ფაქტორი.

- როგორც აღნიშნეთ ივანიშვილმა ფული იშოვა რუსეთში, შესაძლებელი იყო თუ არა ეს რუსეთის ხელისუფლებასთან თანამშრომლობის გარეშე?

- ეს არის ცილისმწამებლური განცხადებები სააკაშვილისა და მისი "ნაცისტების" მხრიდან. ამ ადამიანისგან ისინი ძალიან დიდი ხნის განმავლობაში ღებულობდნენ ფულს, მაშინ რა წარმოშობის იყო? ივანიშვილი ცნობილია მთელ მსოფლიოში იმით, რომ მისი ბიზნესი თავიდანვე იყო გამჭვირვალე. მისი ბიზნესის აუდიტი ყოველწლიურად ხდება საერთაშორისო ორგანიზაციების მიერ. აქედან გამომდინარე, ეს მართლაც იშვიათი შემთხვევაა, როდესაც ადამიანმა შეძლო წარემართა ბიზნესი ასე პატიოსნად. თუ ადამიანს იოტისოდენა ეკონომიკური განათლება მაინც აქვს, მიხვდება, რომ თუ ადამიანი ფულს იშოვის ქვეყნის ფარგლებს გარეთ და შემოიტანს მას ქვეყანაში, ეს არის სარგებელი საქართველოს ეკონომიკისთვის. დღეს სააკაშვილის რეჟიმის პირობებში უკვე მილიარდ 260 მილიონ დოლარს აგზავნიან გადახვეწილი ქართველები ქვეყანაში, მათი უმრავლესობა სწორედ ოკუპანტი ქვეყნიდან მოდის. მოსკოვი მეორე ქალაქია მსოფლიოში ქართველების რაოდენობით. ეს არის კატასტროფა. ეს არის ბიუჯეტის მესამედი. ეს ყველაფერი 2.5-ჯერ მეტია ინვესტიციებზე. აქ იკვეთება დიდი დანაშაული. ტყუილად არ თქვა თომას ჰამერბერგმა ცოტა ხნის წინ, რომ საქართველოში უდანაშაულობის პრეზუმცია აღარ არსებობს.

- თქვენ რა კავშირი გაქვთ ივანიშვილის კოალიციასთან?

- მე მაქვს პარლამენტში ფრაქცია, რომლის თავჯდომარე იყო გია ცაგარეიშვილი, ახლა როტაციის შედეგად არის დიმიტრი ლორთქიფანიძე. ჩვენ ბიძინა ივანიშვილის გამოჩენის დღიდან სრულიად უპირობოდ მას მხარს ვუჭერთ. მე არაერთხელ ვთქვი, როდესაც სააკაშვილის რეჟიმმა ჩაიდინა ყაჩაღობა და დღისით, მზისით დააყაჩაღა ბიძინა ივანიშვილის ბანკის საინკასაციო მანქანა და ეს გააკეთეს უფორმო ადამიანებმა ნიღბებით, ეს იყო იგივე, რაც სტალინმა ჩაიდინა გასულ საუკუნეში.

- კონკრეტულად რა ფორმით უჭერთ მხარს ივანიშვილს? თუ ყოფილა მოლაპარაკება იმაზე, რომ შესაძლოა კოალიციას შეუერთდეთ?

- მე გაცნობითი შეხვედრები არ მჭირდება, მას კარგად ვიცნობ, მაგრამ ჩვენები არაერთხელ შეხვდნენ. მოგეხსენებათ, ცაგარეიშვილი ალასანიას პარტიაში არის გამგეობის წევრი, ასევე არაერთხელ შეხვდა ივანიშვილს დიმიტრი ლორთქიფანიძე. მაგრამ მთავარია არა ეს, არამედ პოლიტიკური მხარდაჭრა ჩვენი მხრიდან.

- თუ შედგა შეხვედრა ჯონდი ბაღათურიასა და ბიძინა ივანიშვილს შორის?

-არ ვიცი. რაც შემეხება მე, მას უპირობოდ ვუჭერ მხარს. მე ვიცი მისი კრედო, მან ეს პროგრამის სახითაც წარმოადგინა. მხარს ვუჭერ იმას, რომ საქართველოში წნეხიდან გათავისუფლდეს ბიზნესი. მოგეხსენებათ "ოქსფორდ ანალიტიკსის" ცნობილი ანალიტიკური ცენტრის კვლევა, სადაც წერია, რომ საქართველოს ეკონომიკა სრულ სტაგნაციაში გადადის. ქართული სასამართლოები დღეს არის ქცეული პროკურატურის ფილიალად და რეპრესიულ ინსტრუმენტად სააკაშვილის რეჟიმის ხელში.

ანი ყაზაიშვილი

პოლიტიკა  |  სამშაბათი, 20 მარ 2012 09:05
no_bannerno_banner

კომენტარები

comments powered by Disqus

მსგავსი სიახლეები

ჰერმან ვან რომპეის დონალდ ტუსკი, კეტრინ ეშტონს კი ფედერიკა მოგერინი შე ...

პოლონეთის პრემიერმინისტრი დონალდ ტუსკი ევროპული საბჭოს პრეზიდენტი გახდა.

ვრცლად

ევროპა რუსეთისთვის ახალი სანქციების დაწესებას გეგავს

უკრაინაში განვითარებული მოვლენების გამო ევროპა რუსეთისთვის ახალი სანქციების დაწე ...

ვრცლად

ECXLUSIVE რატომ ჩამოდის პენტაგონის თავდაცვის მდივანი საქართველოში

ჩაკ ჰეგელი საქართველოში ჩამოდის. პენტაგონის თავდაცვის მდივანი აქ თავდაცვის მინის ...

ვრცლად

ექსკლუზივი - ვაშაძის ინფორმაციით, ხელისუფლება ნოდარ ხადურის შემცვლელს ...

საპარლამენტო უმცირესობის ერთ-ერთი ლიდერის, დეპუტატ გიორგი ვაშაძის ინფორმაციით, & ...

ვრცლად

პრემიერმა მინისტრთა კაბინეტის წევრებთან სამუშაო შეხვედრა გამართა

საქართველოს პრემიერ–მინისტრმა ირაკლი ღარიბაშვილმა მინისტრთა კაბინეტის წევრ ...

ვრცლად

საქართველოს პრეზიდენტმა საერთაშორისო ლიდერთა ფორუმი გახსნა

საქართველოს პრეზიდენტმა გიორგი მარგველაშვილმა საერთაშორისო ლიდერთა ფორუმი გახსნა ...

ვრცლად
no_banner