41 წლის საიმონ ბურგესი ჰემპშირში, გოსპორტის პარკის ტბაში მაშინ ჩავარდა, როცა ის გედებს აჭმევდა. თვითმხილველმა 53 წლის ჯილიან ჰეჯესმა მაშინვე სამაშველო სამსახურში 999 დარეკა, თუმცა მაშველებმა განაცხადეს, რომ მათ უფლება არ ჰქონდათ ამ ტბაზე სამაშველო ოპერაცია განეხორციელებინათ, რადგანაც წყალი აქ საკმაოდ მეჩხერი იყო.ამის შესახებ ინფორმაციას The Sun ავრცელებს.

საიმონ ბურგესი წყლიდან მხოლოდ 28 წუთის შემდეგ გამოიყვანეს, მას შემდეგ, რაც მის საშველად პარკის ტერიტორიაზე ვერტფრენი გამოჩნდა. თუმცა, მამაკაცის გადარჩენა უკვე ვერ შეძლეს. ოფიციალური მონაცემებით, საიმონ ბურგესი ნაპირიდან 6 მეტრით იყო დაშორებული, სადაც წყლის სიღრმე მხოლოდ ერთი მეტრია.

ექსპერტების განმარტებით, მამაკაცის გადარჩენის შანსები არსებობდა. სამაშველო სამსახურის განმარტებით კი, ტბის უსაფრთხოებაზე პასუხს ე.წ. "მეორე საფეხურის" მაშველებს უნდა ეზრუნათ, რომლებიც მსგავსი სიღრმის წყლებში ადამიანების უსაფრთხოებაზე არიან პასუხისმგებელნი.