კოჯრის მიმდებარე ტერიტორიაზე, 90-იან წლების დასაწყისში იუნკერთა ხსნოვნის პატივსაცემად აგებული მემორიალი, თბილისის მერმა გიგი უგულავამ გვირგვინით შეამკო.

"დღევანდელი დღე სიმბოლურია ბევრი რამის გამო, პირველ რიგში, ეს იყო დღე, როდესაც ჩვენ, ქართველებმა, დავადასტურეთ, რომ ბრძოლას ყოველთვის აქვს აზრი. ამ მაგალითის შემდეგ, ჩვენთვის ცხადი ხდება, რომ თუ არის ერთსულოვნება, თუ არის თავდადება ყოველთვის აქვს ბრძოლას აზრი. მეორე კუთხითაც არის სიმბოლური ეს დღე. მიუხედავად იმისა, რომ საქართველოს სხვა ტერიტორიები წითელ არმიას დაპყრობილი ჰქონდა, გადამწყვეტი ბრძოლა ყოველთვის ხდებოდა თბილისთან და თბილისისთვის. თბილისის დაცვა ნიშნავდა საქართველოს დაცვას. თბილისის დაცემა ნიშნავდა საქართველოს დაცემას. ამიტომ იყო გააფთრებული ბრძოლა მე-11 არმიის მხრიდან თბილისის ასაღებად და სწორედ ამიტომ იყო თავდადებული ბრძოლა თბილისის დასაცავად საჭირო" - განაცხადა თბილისის მერმა.

მისივე თქმით, იუნკერების მაგალითი ადასტურებს, რომ ბრძოლას ყოველთვის აქვს აზრი, თუ იქნება ერთსულოვნება საქართველო ყველა გამოწვევას გაუძლებს.

შეგახსენებთ, რომ 1921 წლის 17 თებერვალს, საბჭოთა რუსეთის მე-11 არმიამ ომის გამოუცხადებლად საქართველოს ანექსია მოახდინა. ქართველი იუნკერები თბილისის მისადგომებთან, ტაბახმელა-კოჯორში განლაგდნენ. 1921 წელს, თბილისის დაცვისას ქართულ არმიაში იუნკერები ერთადერთი ქვედანაყოფი იყო, ვინც ბრძოლის დროს უკან არ დაიხია.

1921 წლის 24 თებერვალს საქართველოს დამოუკიდებლობისთვის მებრძოლ იუნკერთა დიდი ნაწილი გმირულად დაეცა ბრძოლის ველზე. გარდაცვლილი იუნკერები ძმათა სასაფლაოზე დაკრძალეს, რომელიც დღევანდელი პარლამენტის და მაშინდელი “სობორის” ალექსანდრე ნეველის სახელობის ეკლესიის ეზოში მდებარეობდა. დღევანდელი პარლამენტის ქვეშ დღემდე განისვენებენ კოჯორი-ტაბახმელაზე დაღუპული ათი იუნკერი და მოწყალების და - მარო მაყაშვილი.