"დემოკრატიული მოძრაობა - ერთიანი საქართველოს" ლიდერმა ნინო ბურჯანაძემ "პრაიმტაიმის" პრესკლუბში მისი პარტიის მთავარ მიმართულებაზე, ბიძინა ივანიშვილის კოალიციასა და მიმდინარე პოლიტიკურ მოვლენებზე ისაუბრა.

– პირველი შეკითხვა ეხება „ახალი თაობა – ახალი ინიციატივას“ სარჩელს. რამდენად ელით, რომ საპარლამენტო არჩევნები ჩატარდება გაზაფხულზე? როგორია თქვენი დამოკიდებულება ზოგადად ამ საკითხისადმი?

– რაც შეეხება საპარლამენტო არჩევნების შესაძლო ჩატარებას მაისში, ამის თაობაზე ჩვენს პოლიტიკურ ძალას არაერთხელ უთქვამს. პირდაპირ შემიძლია გითხრათ, საპარლამენტო არჩევნები ჩატარდება მაშინ, როცა ხელისუფლება ჩათვლის, რომ მეტი შანსი აქვს, უპრობლემოდ გაიფორმოს საპარლამენტო არჩევნებში გამარჯვება. აქ არაფერ შუაშია არც სარჩელი, არც საკონსტიტუციო სასამართლოს გადაწყვეტილება. გადაწყვეტილება იქნება ისეთი, როგორიც ენდომება მიხეილ სააკაშვილს, ეს ჩვენ ყველამ ძალიან კარგად ვიცით. სამწუხაროა, რომ ხშირ შემთხვევაში არასამთავრობო ორგანიზაციების ნაწილიც თამაშობს სახელისუფლებო თამაშს. თუ ასეთი სარჩელის შეტანის სურვილი ჰქონდათ, შესაძლებელი იყო, ეს გაცილებით ადრე გაეკეთებინათ და დადებითად გადაწყვეტის შემთხვევაში მეტი დრო მისცემოდა ოპოზიციას. ჩემთვის ნათელია, რომ ეს არ არის ამ ორგანიზაციის დამოუკიდებელი გადაწყვეტილება. შეიძლება ხელისუფლება დააკვირდეს რეაქციებს, შეიძება არც გაითვალისწინოს.

– რამდენად მზად არიან ოპოზიციური პარტიები არჩევნებისთვის?

– დღეს არჩევნებისთვის თუ ვინმე არის მზად, ეს არის მიხეილ სააკაშვილი და „ნაციონალური მოძრაობა“. არა იმიტომ, რომ ისინი ყველაზე მაგრები არიან, არამედ იმ მარტივი მიზეზის გამო, რომ ქვეყანაში შექმნილია ისეთი რეალობა, რომ მხოლოდ „ნაციონალურ მოძრაობას“ აქვს რეალურად რესურსი, ნორმალური საარჩევნო კამპანია აწარმოოს. მხედველობაში მაქვს მედიარესურსი, რომელიც 90% შემთხვევაში ღიაა მხოლოდ ხელისუფლებისთვის. მხედველობაში მაქვს ფინანსური რესურსი, რომლის გამჭვირვალობაზე, მემგონი, კითხვის ნიშანიც არავის უჩნდება. „ნაციონალურ მოძრაობას“ აქვს ბერკეტები იმ პროექტების განხორციელების თვალსაზრისით, რომელსაც ბიუჯეტიდან ახორციელებენ, მაგრამ ადამიანების გულს იგებენ. ჩვენ ნამდვილად გვაქვს ყველა რაიონში ორგანიზაციები. დაარსების დღიდან ვატარებდით კონფერენციებს ყველა დიდ რაიონში. „სახალხო კრების“ ფორმატშიც აქტიურად ვმუშაობდით რეგიონული ორგანიზაციების გაძლიერების თვალსაზრისით. ჩვენ ვართ ის პარტია, რომელსაც, „ფორუმისა“ და „ქრისტიან-დემოკრატების“ მსგავსად, თითქმის ყველა რეგიონში აქვს ორგანიზაცია. რაც შეეხება სხვა პარტიებს, მაქვს ინფორმაცია, რომ ცალკეულ რაიონებში მათ აქვთ დასაყრდენი. ვშიშობ, ახალი პოლიტიკური ძალა ვერ მოასწრებს რაიონული ორგანიზაციების დაფუძნებას. გუშინ ბიძინა ივანიშვილმა გააკეთა განცხადება, რომ მათ უკვე 44 რაიონში აქვთ რაიონული ორგანიზაცია. მე „კავკასიაში“ გავაკეთე განცხადება, ნამდვილად არა ნიშნის მოგების მიზნით, არამედ იმ მიზნით, რომ ბატონ ბიძინას ყურამდე მივიდეს ის, რასაც ვამბობ, მე ერთი წამითაც არ ვუშვებ იმას, რომ ივანიშვილმა შეგნებული ტყუილი თქვა. მე ვფიქრობ, რომ ის მართლაც დარწმუნებულია თავისი გარემოცვის მხრიდან, რომ უკვე შექმნილია 44 რეგიონში სტრუქტურა. ეს ასე არ არის, მან უნდა იცოდეს სიმართლე. სამწუხაროდ, ძალიან სერიოზული სამუშაოა გასაწევი, თუ ივანიშვილი რეალურად ფიქრობს, რომ შედეგი მინიმალურად მაინც დაიდოს ამ არჩევნებზე. მე არ მაქვს არანაირი ილუზია იმ საარჩევნო გარემოს პირობებში, რომელიც „რვიანის“ და „ექვსიანის“ წყალობით მივიღეთ. „ექვსიანის“ წყალობით, რომელიც დღეს სრული შემადგენლობითაა წარმოდგენილი ბიძინა ივანიშვილთან, ჩვენ მივიღეთ ერთმნიშვნელოვნად გაუარესებული გარემო. მგონი, კითხვაც არავის არ აქვს. დღეს საარჩევნო გარემო გაცილებით მძიმეა ოპოზიციისთვის, ვიდრე ეს იყო თუნდაც ერთი წლის წინათ. ამ პირობებში „ნაციონალური მოძრაობა“ შეძლებს, გაიფორმოს გამარჯვება. ფორმალურად ის დაწერს იმ ციფრებს, რაც მას აწყობს. მე არ ვამბობ, რომ ის 80%-ით გაიმარჯვებს, თუმცა რომ მოინდომოს, ესეც შეუძლია გააკეთოს. სხვადასხვა პარტიებს გადაანაწილებენ პარლამენტში, მათი უმრავლესობა იქნება პარტიები, რომლებიც ექვემდებარებიან ხელისუფლებას. ეს არის სამწუხარო რეალობა, რომელიც აუცილებლად დადგება იმ შემთხვევაში, თუ ოპოზიცა დღეს მაინც არ გამოფხიზლდება. მე ზუსტად ვიცი, რა შედეგი დადგება. ისევე, როგორც ზუსტად ვიცოდი, რაც დადგებოდა აქამდეც. მე არ მინდა ნიშნის მოგებით ვესაუბრო მერე საზოგადოებას. ამ ეტაპზე ვფიქრობ, რომ აბსოლუტურად გასაგებია, როგორ დასრულდება ეს არჩევნები. ჯერჯერობით არ მიგვიღია გადაწყვეტილება, მივიღებთ თუ არა მონაწილეობას არჩევნებში, რადგან არ ვიცით, როდის ჩატარდება არჩევნები და იქნება თუ არა ელემენტარული საშუალება მაინც, რომ დამოუკიდებელი არჩევნები ჩატარდეს. მას შემდეგ, რა დასკვნაც დადო გაეროს სპეციალურმა წარმომადგენელმა საქართველოს საარჩევნო გარემოზე, ვერ წარმომიდგენია, როგორ შეიძლება საქართველოს დემოკრატიულობაზე საუბარი. თუ სრულიად საქართველო გადაწყვეტს, რომ ისინი არიან მართლები და მე ვცდები, რა თქმა უნდა, გავითვალისწინებ საზოგადოების უმრავლესობის აზრს და გამიხარდება, თუ ვცდები. მე არ მიჭირს შეცდომების აღიარება, თუმცა ეს არცთუ ხშირად ხდება.

– რა გეგმით უნდა განვითარდეს პოლიტიკური პროცესები, ოპოზიციას შანსი რომ ჰქონდეს?

– ალბათ, წაიკითხეთ „ასავალ-დასავალში“ სტატია, სადაც მე ვსაუბრობ იმ ვარიანტზე, რომელიც იყო შესაძლო გამარჯვების ფორმულა. მე ვთქვი, რომ როდესაც ბატონი ბიძინა გამოჩნდა პოლიტიკურ ასპარეზზე, მე, ისევე როგორც ბევრი ქართველი, მივესალმე მის გამოჩენას. ნამდვილად მიმაჩნდა და დღესაც მიმაჩნია, რომ მისი შემოსვლა ნამდვილად იყო გარდატეხის შემომტანი. გაჩნდა შანსი იმისა, რომ ნაკლებად მტკივნეულად იქნეს ხელისუფლება შეცვლილი. ბიძინა ივანიშვილს, რომელსაც აქვს ხალხის ნდობა იმის გამო, რომ ბევრი კარგი საქმე აქვს გაკეთებული, ჰქონდა შანსი, გაეერთიანებინა სრულიად ოპოზიცია ერთადერთი ნიშნით, რომ ებრძოლა ხელისუფლების წინააღმდეგ, მეორე პლანზე უნდა გადასულიყო იდეოლოგიური თემა. ეს ახლაც ასეა, რადგან მის გუნდში არიან „რესპუბლიკელები“ და „ფორუმი“, რომელთა იდეოლოგიაც მნიშვნელოვნად განსხვავდება. „ფორუმის“ იდეოლოგია გაცილებით ახლოსაა დემოჯრატიული მოძრაობის იდეოლოგიასთან, ვიდრე რესპუბლიკელების ან თავისუფალი დემოკრატების. ზვიად ძიძიგურის და კობა დავითაშვილის იდეოლოგია პირდაპირ ემთხვეოდა კახა კუკავას იდეოლოგიას და რადიკალურად განსხვავდებოდა თავისუდალი დემოკრატებისგან. ამიტომ ვერ ვიტყვით, რომ ეს იდეოლოგიური ერთობაა და პროდასავლური. მე არ ვიცი, რა ნიშნით არიან ისინი ერთად. იდეოლოგიური ნიშნით რომ ძიძიგური, რესპუბლიკელები და დავითაშვილი ერთად ვერ იქნებიან, ეს ნათელია. აქ უნდა ყოფილიყო ამავე საფუძვლებით გაერთიანება. არანაირი მინუსი არ უნდა ყოფილიყო, გარდა იმ პარტიებისა, რომლებიც რეალურად არიან შეკრული ხელისუფლებასთან. უნდა შემდგარიყო ერთობა, რომელიც გამოაცხადებდა, რომ ჩვენ შეკრებილი ვართ იმისთის, რომ გადავარჩინოთ ჩვენი ქვეყანა, დავუპირისპირდეთ სააკაშვილის რეჟიმს. ჩვენ უნდა გადავტეხოთ ვითარება, გამოვგლიჯოთ უმრავლესობა და ავიღოთ ვალდებულება, რომ ექვსი თვის თავზე რეალურად ჩატარდება თავისუფალი და დემოკრატიული არჩევნები, სადაც ერთიანი ფრონტი ნამდვილად დაიშლებოდა და რეალურად იქნებოდა შეკრებები იდეოლოგიურ საკითხებზე. გაერთიანებული ფრონტის გამარჯვების შემდეგ იქნებოდა იმ ხუთი კომპონენტის მიღწევა, რასაც ჰქვია თავისუფალი მედია, თავისუფალი სასამართლო, თავისუფალი ბიზნესი, დამოუკიდებელი ცესკო და აპოლიტიკური პოლიცია. მით უმეტეს, თუ არჩევნები იქნება მაისში, არ არსებობს სხვა ფორმულა გამარჯვებისთვის, ამის გარდა.

– ბიძინა ივანიშვილი რომ არ გამოჩენილიყო, შეეცდებოდა თუ არა ხელისუფლება ასე აქტიურად მაისში არჩევნების დანიშვნას?

– „სახალხო კრების“ მოკვდინების მცდელობა იყო ხელისუფლების მხრიდან, ამაზე, სხვათა შორის, საუბრობს გაეროს სპეციალური წარმომადგენელიც, რომელმაც აღნიშნა, რომ მნიშვნელოვანია გამოძიება ჩატარდეს 6 მაისთან დაკავშირებით. მან თქვა, რომ საქართველო არის კრიტიკულ ზღვარზე. 26 მაისს ხელისუფლების მხრიდან განხორციელდა არა მომიტინგეთა დაშლა, არამედ მათი სამაგალითო დასჯა იმისთვის, რომ დაეშინებინათ სხვა მოქალაქეები. 26 მაისის შემდეგ „სახალხო კრებამ“ მიიღო უზარმაზარი დარტყმა, რომლის შემდეგაც კვლავ საბრძოლო მდგომარეობაში მოსვლას გარკვეული დრო სჭირდებოდა. ხელისუფლება აგრძელებს ტერორს. გუშინწინ დააკავეს გია სალუქვაძე, ჩვენ გამოვაქვეყნეთ მისი სიტყვა, რომელმაც არათუ არ აღიარა დანაშაული, არამედ დაასახელა კუდ-ის ის მაღალჩინოსნები, რომლებიც მას სთხოვდნენ, რომ ხელი დაედო ირაკლი ბათიაშვილისთვის და ბადრი ბიწაძისთვის, თითქოს ისინი შეიარაღებულ გადატრიალებას აწყობდნენ. მან დაასახელა გვარები და მოითხოვა ამ ადამიანების დასჯა. ამ განცხადებას მოჰყვა ის, რომ ნაცვლად წინასწარ შეთანხმებული სამი წლისა, რომელზეც პროკურორი ლაპარაკობდა, მოსამართლემ მას მიუსაჯა 4 წლით თავისუფლების აღკვეთა. ასევე, 2 დღის წინ ჩატარდა სასამართლო, სადაც ჩემს დეიდაშვილს ზვიად ბერაძეს მიუსაჯეს 5 წლით თავისუფლების აღკვეთა. მისი დაკავების ოქმი უკვე გაგზავნილია სტრასბურგში, საქმეში რეალურად არც ერთი მოწმე არ არსებობს. ეს არის ადამიანი, რომელიც ცხინვალის კონფლიქტის დროს 2008 წელს წარდგენილი იყო ჯილდოზე საომარი მოქმედების დროს გამოჩენილი გმირობისთვის. მან მაშინ უარი განაცხადა, სიტყვებით: მე არ ვაპირებ, ჯილდო მივიღო წაგებული ომისთვის. ამ სიტყვების შემდეგ ერთ თვეში ის გაათავისუფლეს სამსახურიდან. აღარ გავაგრძელებ იმ ადამიანებზე საუბარს, რომლებიც ასევე უკანონოდ იხდიან სასჯელს. არ გავუშვებ ამ მომენტს ხელიდან, რომ არ ვთქვა სასტიკი საყვედური ე.წ. ოპოზიციური პარტიების მიმართ, რომლებიც საერთოდ არ დარდობენ ამ ადამიანების ბედზე. ერთადერთი, ვინც პარლამენტში გამოჩნდა თავის სიმაღლეზე, არის დიმიტრი ლორთქიფანიძე, რომელიც ლაპარაკობს და ზრუნავს ამ ადამიანების ბედზე. რაც შეეხება დანარჩენ ოპოზიციურ პარტიებს, გარდა ჩვენი პარტიისა და „თეთრებისა“, კახა კუკავა და „ფორუმი“ არიან ის ადამიანები, რომლებიც ამ პატიმრებზე საუბრობენ. ჩვენ, რა თქმა უნდა, დაგვჭირდა ძალიან სერიოზული დრო, ძალა და ენერგია, რომ ძალები აღგვედგინა. სწორედ „სახალხო კრებამ“ და 26 მაისმა მისცა ბიძგი ბიძინა ივანიშვილს, რომ გამოჩენილიყო. მე არ გამოვრიცხავ, რომ ძალიან ბევრი მომენტი ხელისუფლების მიერ გადადგმული ნაბიჯებისა უკავშირდებოდეს ბიძინა ივანიშვილის აქტიურობას. ჩვენ ეს საკუთარ თავზე გვაქვს გამოცდილი. ზოგიერთმა პოლიტიკურმა პარტიამ და ლიდერმა ახლა დაინახა, რას ნიშნავს, როდესაც ცილს დაგწამებენ, ჩამოგართმევენ იმ ქონებას, ან გაგიფუჭებენ, რომელიც შენ საერთო საქმის გასაკეთებლად გჭირდება. როგორც ეს სახალხო კრებას გაუკეთეს, როდესაც ის უზარმაზარი ავტომობილი, რომელზეც 26 მაისს სცენა იყო დამონტაჟებული საერთოდ გაქრა. ქვეყანაში, სადაც ავტომობილები არ იკარგება, როგორც ამას შსს ამბობს, სად გაქრა ამხელა მანქანა, რომელზეც ძალიან ძვირადღირებული ტექნიკა იყო დამალული? ხომ ვერ იტყვიან, სახალხო კრებამ წაიღო და დამალაო? როცა ჩვენ გვხოცავდნენ, ის მანქანა იდგა იქ. ჰკითხეთ ბრიფინგებზე შსს-ს, სად არის ეს მანქანა აორთქლებული. რა თქმა უნდა, არ დაგიბრუნებენ, რადგან იციან, რომ ამ მანქანას გამოიყენებს იმისთვის, რომ მოსახლეობას შეხვდე და ადამიანებს ესაუბრო. არც ერთ პოლიტიკურ პარტიას არ გამოუცდია ისეთი ტერორი თავის თავზე, როგორც ჩვენს პოლიტიკურ ორგანიზაციას, მაგრამ მაინც უსიამოვნოა, როდესაც დააპატიმრებენ შენს მომხრეებს. ჩვენ ძალიან კარგად ვიცით, რას ნიშნავს შენს წინააღმდეგ სპეციალურად მიღებული კანონები. მე ვიცი, არსენალში რა გეგმები და შესაძლებლობები აქვს ხელისუფლებას და სწორედ ამიტომ ვლაპარაკობ. ასე ლამაზი სიტყვებით და ლამაზ დარბაზებში გაკეთებული განცხადებებით არ იცვლება ავტოკრატული რეჟიმი. ასეთი რამ არ მომხდარა მსოფლიო ისტორიაში. თუ არის ადამიანის სიკვდილ-სიცოცხლის საკითხი, შეიძლება ადამიანს ოპერაცია პედიატრმაც გაუკეთოს. მოხარული ვიქნები, თუ საქართველოში მოხდება ის, რომ დიქტატურისკენ მიმავალი რეჟიმი შეიცვლება არჩევნების გზით, მაგრამ, სამწუხაროდ, ამის შანსს ვერ ვხედავ.

– მახსოვს თქვენი განცხადებები, რომ ქუჩის აქციები საჭიროა იმისთვის, რათა ქვეყანაში შეიქმნას თავისუფალი საარჩევნო გარემო და შემდეგ ჩატარდეს სამართლიანი არჩევნები. თინა ხიდაშელს დღემდე ესმის, რომ თქვენ მომხრე ხართ ქუჩის აქციების. მათ მართლა ასე ჰგონიათ, თუ ეს არის ივანიშვილის კოალიციაში თქვენი დაბლოკვის არგუმენტი?

– ეს კითხვა აჩვენებს იმას, რომ თქვენ ძალიან კარგად გესმით, რაზე ვსაუბრობდით „სახალხო კრება“. ჩვენი პარტიის ვებგვერდზე ჩამოყალიბებულია ჩვენი პარტიის კონცეფციები. პირველია ეროვნული უსაფრთხოების კონცეფცია. რაც შეეხება შეკითხვას, მე არ ვიცი, ეს არის დაბლოკვის მცდელობა თუ არა, თუმცა მათ ინტელექტუალურ შესაძლებლობებში ეჭვი არ მეპარება. ეს არის ხელოვნური. ოპოზიციის ამოცანა ჩემი ოპოზიციაში გადმოსვლის დღიდანვე იყო ბრძოლა ბურჯანაძის წინააღმდეგ და არა სააკაშვილის. ყველა კოალიცია იქმნებოდა ბურჯანაძის წინააღმდეგ. მე მესმის, რომ ეს ჩემს პოლიტიკურ წონასთან და გამოცდილებასთანაა დაკავშირებული, მაგრამ საერთო საქმე ფუჭდება. სამწუხაროა, რომ ასევე ოპოზიცია იყო ის ძალა, რომელმაც აიტაცა სააკაშვილის ბრალდებები პრორუსულობასთან დაკავშირებით, ქუჩიდან ხელისუფლების შეცვლასთან დაკავშირებით, რამაც სააკაშვილს ძალიან გაუადვილა ბევრი ადამიანის დარწმუნება. ძალიან ბევრს სურდა საერთაშორისო ასპარეზზე ეს გამოეყენებინა და ეთქვა, ბურჯანაძე აღარ არის თქვენი მეგობარი და ჩემთან იმეგობრეთო. ეს ძალიან იაფფასიანი პოლიტიკური სპეკულაციები იყო. ძალიან ბევრმა ადამიანმა დასავლეთში იცის ჩემი რეალური პოლიტიკური ხედვების შესახებ. ძალიან შევწუხდი, როდესაც ბატონმა ბიძინამ გაიმეორა იგივე. მე არ ვიცი, ის მოექცა სახელისუფლებო პიარის ქვეშ, თუ მეობრების გავლენის ქვეშ. იმედი მაქვს, რომ „ასავალ-დასავალში“ ჩვენი წერილის გამოქვეყნების შემდეგ ბატონი ბიძინა დახარჯავს ერთ საათს მაინც, რომ გაეცნოს ჩვენი პარტიის დოკუმენტებს და ჩასწვდეს იმას, რაზე ვლაპარაკობდით ჩვენ. მე ვადასტურებ რომ ყველა მეთოდით, მათ შორის ქუჩის აქციებითაც უნდა გვებრძოლა იმისთვის, რომ არ დაგვეშვა იმ კანონების მიღება, რომლებიც პარლამენტმა მიიღო. დიახ, ჩვენ უნდა გვებრძოლა, რომ მიგვეღწია მედიის დამოუკიდებლობისთვის და შემდეგ ჩაგვეტარებინა თავისუფალი და დემოკრატიული არჩევნები. არ სჭირდება ივანიშვილს თავის მართლება, რატომ არ ელაპარაკება ბურჯანაძეს. მიმაჩნია, რომ ყველა ადამიანს აქვს უფლება, გადაწყვიტოს, ვის როდის დაელაპარაკება. მე ამის პრობლემას ვერ ვხედავ. თუკი ივანიშვილი რეალურად შეებრძოლება სააკაშვილის ხელისუფლებას, ჩვენი გზები ან გადაიკვეთება ან პარალელურ რეჟიმში წავა და კოორდინირება გახდება საჭირო.

– ბიძინა ივანიშვილი ამბობს, რომ თქვენთან დიალოგი შეიძლება დადგეს დღის წესრიგში, მაგრამ ამას თინა ხიდაშელი გამორიცხავს.

– თუ თინა ხიდაშელი იღებს „ქართულ ოცნებაში“ გადაწყვეტილებას, მაშინ ეს უნდა იცოდეს ქართულმა საზოგადოებამ. ჩემი ინფორმაციით, „ქართული ოცნების“ დამფუძნებელი და თავმჯდომარე ბიძინა ივანიშვილია. თუ ივანიშვილის მაგივრად გადაწყვეტილებებს თინა ხიდაშელი იღებს, ეს უკვე ბიძინა ივანიშვილის პრობლემაა. მე არ მინდა ვთქვა, რომ ივანიშვილი სხვის ჭკუაზე დადის. მას, ალბათ, აქვს გარკვეული არგუმენტები, რატომ არ დგება ეს შეხვედრა ჯერ. მას შეუძლია ღიად განაცხადოს, რომ არ უნდა და არ მხვდება, მაგრამ ნუ დაგვაბრალებენ იმას, რაც არ არის მართალი. ნუ დაგვაბრალებენ ქუჩის აქციებით ხელისუფლების შეცვლის მცდელობას, რაც ტყულია. ეს ერთ-ერთი მეთოდია. ნუ დაგვაბრალებენ პრორუსულობას, იმას, რომ დასავლურ ღირებულებებს არ ვიზიარებთ. არ არის საჭირო ხელისუფლების წისქვილზე წყლის დასხმა. თქვას ბიძინა ივანიშვილმა, რომ არ აპირებს შეხვედრას. არ არის პრობლემა. მე ხომ არ მითხოვია არც შეხვედრა, არც მით უმეტეს, საარჩევნო კოალიციაში შესვლა. ერთადერთი, რასაც მე ვითხოვ, არის ის, რომ ყველაფერი გავაკეთოთ და სწორი ნაბიჯები გადავდგათ იმისთვის, რომ შევებრძოლოთ ამ ხელისუფლებას. ევროპული ღირებულებების ერთ-ერთი ქვაკუთხედი არის საპირწონეებისა და ბალანსის პოლიტიკა. ეს მნიშვნელოვანია ზოგადად ქვეყანაში. ეს მარტო ხელისუფლებას კი არ ეხება, ჩვენს ქვეყანაში, როგორც ჩანს, ეს ოპოზიციასაც ეხება. ნამდვილად არ ვიქნებოდი იმის მომხრე, რომ ხელისუფლებაში ერთ ძალას ჰქონდეს მონოპოლიზებული ხელისუფლება, ხოლო ოპოზიციაში გამოჩნდნენ სხვა მესიანისტური ძალები, რომლებიც მიიჩნევენ, რომ მარტო მათ აქვთ ოპოზიციაში არსებობის უფლება და სხვა ყველა უნდა გაიკრიფოს. „შუა უნდა გაიკრიფოს“ – ეს რა ტერმინოლოგიაა? რიგითი მოქალაქე, თუ არც ერთი მოსწონს და არც მეორე, რატომ უნდა დადგეს არჩევანის წინაშე? იქნებ სხვა ძალა სთავაზობს მათ ალტერნატიულ არჩევანს, რომელიც მოსწონს საზოგადოების 5-15%-ს, მაგრამ მას თავისი აზრის გამოთქმის უფლება აქვს. ვერ ვხედავ ახალი კოალიციის წევრების მხრიდან თანამშრომლობის სურვილს. როცა ჩვენმა ახალგაზრდებმა ბრიფინგი გამართეს, გაიხსენეს ვოლტერის ძალიან ცნობილი სიტყვები: მე შენ არ გეთანხმები, მაგრამ თავს გავწირავ იმისთვის, რომ შენი განსხვავებული აზრის გამოთქმის უფლება გქონდეს. არის მცდელობა, რომ ვისაც არ ეთანხმებიან, იმას საერთოდ არ მოუსმინონ. იქნებ რა არგუმენტები აქვს ადამიანს, როდესაც ის იკავებს ამ პოზიციას და არა სხვას? ამიტომ თავი დავიზღვიოთ, რომ არ მოგვივიდეს იგივე, რაც მოგვივიდა 2008 წელს, როდესაც მოლოდინი იყო, რომ დემოკრატიის სხივი გადმოვიდოდა საქართველოში და პირველ პერიოდში მნიშვნელოვანწილად ეს ასეც იყო, მაგრამ „ნაციონალური მოძრაობის“ მონოპოლიზაციამ და მასში „თავისუფალი დემოკრატების“ და ჩემი გუნდის ნაწილის შერწყმამ, მოიტანა ის შედეგი, რაც დღეს გვაქვს. მოდით, ძალიან ფრთხილად მოვეკიდოთ განსხვავებულ აზრს.

– გარდა იდეურისა, ივანიშვილის კოალიციამ დააწესა სხვა კრიტერიუმებიც, რომელსაც უნდა აკმაყოფილებდეს პოლიტიკოსი, თუ მას აქვს პოლიტიკაში ყოფნის სურვილი. პარტიის პრეზენტაციაზე გუშინ არჩილ კბილაშვილმა განაცხადა, რომ უქონლებისა და სექსუალურად მოუმწიფებელი ადამიანების ადგილი პოლიტიკაში არ არის.

– მის სიტყვებზე ბატონ არჩილს განმარტებები თავად სთხოვეთ, მე ჩემს სიტყვებზე ვარ პასუხისმგებელი. მე ვფიქრობ, რომ პოლიტიკაში მოსვლის კრიტერიუმი არის პატიოსნება, პროფესიონალიზმი და სამშობლოსადმი სიყვარული. თუ ამავე დროს ადამიანს ექნება ფინანსური რესურსიც, ეს ცუდი არ არის. ეს მათ პოლიტიკურად აქტიურობის მეტ საშუალებას აძლევს. მაგრამ საქართველოსნაირ ქვეყანაში ადამიანებს დაუწესო ქონებრივი ცენზი პოლიტიკაში მოსვლისთვის არასწორია. კეთილსინდისიერი და პასიოსანი ადამიანების აბსოლუტურ უმრავლესობას დღეს ჩვენს ქვეყანაში პურის ფული უჭირს.

– რამდენად მოულოდნელი იყო თქვენთვის ის სახეები, რომლებიც ივანიშვილმა ჩამოთვალა და როგორ ფიქრობთ, ეს გუნდი არის რეალურად ის ძალა, რომელიც შეძლებს, ხელისუფლება დაამარცხოს?

– მოულოდნელი არ იყო. საქართველო ძალიან პატარაა და ადვილია ინფორმაციის მიღება მაშინაც კი, როცა მას არ ეძებ. ამიტომ ამ სიის პრაქტიკულად 90% ჩემთვის ცნობილი იყო. რაც შეეხება შეძლებს თუ არა ეს გუნდი არჩევნებში სააკაშვილის დამარცხებას, მგონი, ამაზე პასუხი გაგეცით.

– ამ პარტიაში არის თქვენი ყოფილი თანაგუნდელი ნოდარ ხადური. თუ ჰქონდა ბატონ ნოდარს შეთანხმებული თქვენთან, რომ ბატონ ბიძინასთან მიდიოდა?

– ბატონმა ნოდარმა წასვლის შესახებ განცხადება დაწერა ამა წლის 9 იანვარს. ტრაგედიას ვერ ვხედავ იმაში, რომ ჩვენი პარტიიდან ადამიანები წავიდნენ სხვა პარტიაში. ის, რომ ამ ადამიანებს არ ეშინიათ პარტიიდან წასვლის, ლაპარაკობს იმაზე, რომ, განსხვავებით „ნაციონალური მოძრაობისგან“, ჩვენ ვართ დემოკრატიული ძალა და ჩვენს წევრებს აქვთ აბსოლუტური თავისუფლება კონკრეტულ ეტაპზე პოლიტიკური ცხოვრების განვითარებისა. არ არის ეს ტრაგედია. ადამიანი მიდის, სხვა ადამიანები მოდიან, ეს პოლიტიკური ცხოვრების თანმდევი პროცესი გახლავთ. უბრალოდ, სასურველი იქნებოდა, რომ ადამიანებმა მეტი ვაჟკაცობა გამოიჩინონ მიზეზების ახსნასთან დაკავშირებით. მე ცოტა მომბეზრდა კაცებისგან თავის მართლების მოსმენა. რაღაც პერიოდში მიმაჩნდა, რომ აქ უნდა ყოფილიყავი – ძალიან კარგი, დიდი მადლობა ყველაფრისთვის, რაც ამა თუ იმ ადამიანს გაუკეთებია „სახალხო კრებაში“ თუ „დემოკრატიულ მოძრაობაში“. თუ ახლა თვლის, რომ სხვაგან არის მისი ადგილი და სხვაგან უფრო გამოადგება საერთო საქმეს – წარმატებას ვუსურვებ ყველას, ღმერთმა ხელი მოუმართოთ. მიმაჩნია, რომ ღირსება უნდა შევინარჩუნოთ და ისე მივუდგეთ საქმეს, თუ მართლა დემოკრატები ვართ.

– გუშინდელ პრესკონფერენციაზე ივანიშვილის გუნდის წევრები აცხადებდნენ, რომ დღეს საქართველოში ფული ქმნის პოლიტიკას. ჩვენ აქამდე ასეთი განცხადებები არ მოგვისმენია. ხომ არ უკავშირდება ეს განცხადებები ბიძინა ივანიშვილის პოლიტიკაში მოსვლას? დღეს გიორგი ახვლედიანმა თქვა, რომ ადრე პოლიტიკაში ასაკობრივი ცენზი იყო, დღეს კი ახალი ტენდენცია შემოდის.

– მოდით, ვიყოთ ობიექტურნი. არამხოლოდ ბიძინა ივანიშვილის მოსვლას. სააკაშვილის ხელისუფლებამ ჩაუყარა ამას საფუძველი, როდესაც დაიწყო უზარმაზარი შავი ფულის ხარჯვა, ადამიანების დაშინება ან მოსყიდვა, უზარმაზარი თანხების ხარჯვა პიარ და ლობისტურ კომპანიებში და მართლაც სერიოზულად შეზღუდა საარსებო გარემო და სასუნთქი არეალი ოპოზიციური პარტიებისთვის. რა თქმა უნდა, ოპოზიციურ პარტიებს არსებობისთვის თანხები სჭირდებათ, თუნდაც იმისთვის, რომ არენდის ფული გადაიხადონ, ტელეფონი იყოს ჩართული ოფისში და პრინტერი მუშაობდეს. ნუ დავაბრალებთ ყველაფერს ბიძინა ივანიშვილს. ეს ყველაფერი დაიწყო მიხეილ სააკაშვილმა, როდესაც დაიწყო სატელიტი პოლიტიკური პარტიების შექმნა, დეპუტატების გადაბირება და ამაში ფულის გადახდა. სააკაშვილს ახლა ეს არ მოსწონს, რა თქმა უნდა, რადგან ვერც ერთმა პოლიტიკაში მყოფმა ოპოზიციურმა ძალამ მას ამ ფრონტზე კონკურენცია ვერ გავუწიეთ. მიუხედავად იმისა, რომ მუდმივად იყო საუბარი ბურჯანაძის მილიონებზე, რუსულ ფულზე და „გაზპრომის“ მილზე მიერთებულ „დემოკრატიულ მოძრაობაზე“, თუმცა ეს არასოდეს არავის დაუმტკიცებია, ჩანდა, რომ ჩვენ გვქონდა ათასჯერ უფრო ნაკლები რესურსი, ვიდრე ჰქონდა ხელისუფლებას. ახლა ამ არენაზე გამოჩნდა ხელისუფლების საპირწონე. კარგია, რომ ეს გამოჩნდა. იმედი მაქვს, არ მოხდება ისე, რომ ან სააკაშვილის ფული მუშაობდეს, ან ივანიშვილის. იმედი მაქვს, ის რესურსი, რომელიც ივანიშვილს აქვს, სწორად წარიმართება და იმავე მეთოდებით არ იმოქმედებენ, რა მეთოდებითაც მოქმედებს სააკაშვილი.

– თქვენ ახლა ახსენეთ, რომ მიხეილ სააკაშვილმა შემოიტანა შავი ფული. თქვენ თითქმის 5 წელი იყავით ერთად. როცა ახლა ამას აცხადებთ, რა დამამტკიცებელი საბუთები გაქვთ? გარდა ამისა, ბოლო დროს დამკვიდრდა პოლიტიკაში ტერმინი – „სატელიტი ოპოზიციური პარტიები“. თუ შეგიძლიათ, კონკრეტულად დაადოთ ხელი ამ პარტიებს?

– მოსახლეობა ძალიან ბრძენია და ის ძალიან კარგად ხედავს, ვინ აკეთებს სააკაშვილის საქმეს საკუთარი ხელით. აქ ლაპარაკია იმ პარტიებზეც, რომლებიც წარმოდგენილნი არიან პარლამენტში და იმ ადამიანებზეც, რომლებიც არიან პარლამენტს გარეთ და ყველაზე მეტს ყვირიან. რაც შეეხება შავ ფულთან დაკავშირებულ საკითხებს, მე ეს კითხვა არაერთხელ დამისვამს იგივე შს მინისტრისთვის ჩემი ხელისუფლებაში ყოფნის დროსაც. მე ძალიან დიდი ეჭვები მიჩნდებოდა იმასთან დაკავშირებით, რომ ქვეყანაში, სადაც ლამის ყველა მომხმარებელი ციხეშია, როგორ ხერხდებოდა, რომ სადარბაზოები სავსე იყო „შპრიცებით“? ამაზე პასუხი მივიღე სახელმწიფო დეპარტამენტის მიერ გამოქვეყნებულ დასკვნაში. ბუნებრივია, პარლამენტის თავმჯდომარეს ამ ინფორმაციას არავინ მისცემდა. ძალიან მოდაში შემოვიდა ყველაფრის ჩემთვის დაბრალება, შეიძლება მეორე მსოფლიო ომის დაწყებაც მე დამაბრალონ, თუმცა არავინ არ იღებს პასუხისმგებლობას წაგებულ ადგილობრივ არჩევნებთან დაკავშირებით. პარლამენტის თავმჯდომარეს აქვს ძალიან განსაზღვრული ფუნქციები და მე ყოველთვის ვცდილობდი ამ ჩარჩოებში ჩავჯდარიყავი. პარლამენტის თავმჯდომარე ვერ ჩაატარებდა გამოძიებას შავი ფულის მოძრაობასთან დაკავშირებით. კითხვები იგივე იარაღის შესყიდვებთან, ნარკოტიკების მოძრაობასთან დაკავშირებით ისმებოდა, მაგრამ დოკუმენტაცია ამასთან დაკავშირებით არ მქონდა. დღეს მე სრული უფლება მაქვს, ამაზე განცხადება გავაკეთო, რადგან ვნახეთ ისრაელთან დაკავშირებული სკანდალი, ფაქტია, რომ არ არის მთლიანად თეთრი გამოძიება. ჩვენ ვნახეთ აშშ-ს სახელმწიფო დეპარტამენტის დასკვნა, სადაც საუბარია იმაზე, რამდენი ტონა ნარკოტიკი მოძრაობს საქართველოს ტერიტორიაზე. ქვეყანაში, სადაც რაღაც რომ გადაუჩურჩულოთ ადამიანს, შეიძლება საღამოს უკვე ვანო მერაბიშვილმა იცოდეს ამის თაობაზე. როგორ შეიძლება მოძრაობდეს ტონობით ნარკოტიკული საშუალება ისე, რომ ამაში ხელისუფლება არ იყოს ჩართული? გარდა ამისა, მე ვხედავ, რა ხარჯები აქვს ხელისუფლებას. ეს არ არის მარტო საბიუჯეტო ხარჯები. ეს არის მილიონობით ხარჯი, რომელსაც ისინი სწევენ საზღვარგარეთ ლობისტურ, პიარკომპანიებში; მილიონობით ხარჯი, რომელსაც ხარჯავენ სხვადასხვა ადამიანების მოქრთამვაში და მილიონობით თანხა, რაც ჯდება თუნდაც სააკაშვილის ვიზიტები საზღვარგარეთ. თუნდაც ბოლო ვიზიტი, როცა 200-კაციანი დელეგაციით მიდიხარ და აბსოლუტურად განუსაზღვრელი ხარჯი ლაპარაკობს იმაზე, რომ ქვეყანაში ძალიან დიდი რაოდენობით შავი ფული მოძრაობს. ის შენებლობები, რომლებიც საქართველოში მიმდინარეობს, ამდენი სასტუმრო საქართველოს მდგომარეობაში მყოფ რომელ ქვეყანაში შენდება? სასტუმროების ბიზნესი ფულის გათეთრების მშვენიერი გზაა. გაიარეთ საღამოს თბილისის ქუჩებში, ნახეთ აშენებული სასტუმროები და დაითვალეთ, რამდენ ოთახში ანთია შუქი.

– გვაინტერესებს თქვენი მოსაზრება ბათუმში აზიზიეს მეჩეთის მშენებლობასთან დაკავშირებით, ასევე თურქეთის მიერ გამკაცრებულ სავიზო რეჟიმზე. გარდა ამისა, თქვენ ბრძანეთ, რომ რეგიონული სტრუქტურები შენარჩუნებული გაქვთ. თუ აპირებთ ამ რესურსის გამოყენებას იმ შემთხვევაში, თუ მაისში დაინიშნება არჩევნები?

– არჩევნებში მონაწილეობის შემთხვევაში ჩვენ, რა თქმა უნდა, გამოვიყენებთ იმ რეგიონულ რესურსებს, რომლებიც ჩვენ გვაქვს. რაც შეეხება ბათუმში აზიზიეს მეჩეთის მშენებლობის საკითხს, ამ საკითხთან დაკავშირებით 10 თებერვალს გავაკეთეთ განცხადება. ჩვენ ადრეც გამოვეხმაურეთ საპატრიარქოს გულისტკივილს იმასთან დაკავშირებით, რომ თურქეთთან მოლაპარაკების პროცესში საპატრიარქო არ იყო ჩართული და ხელისუფლების მხრიდან იყო აბსოლუტურად იგნორირებული. ჩვენ გავაკეთეთ განმარტება იმასთან დაკავშირებით, რომ ჩვენ ძალიან კარგად ვიცით, რომ ხელისუფლებას არ აღელვებს ეკლესია-მონასტრების ბედი. ამის დასტურია იგნორირება, რაც ხელისუფლებამ გააკეთა ილორის წმინდა გიორგის ეკლესიასთან დაკავშირებით. ამ პრობლემის მოგვარება შესაძლებელი იყო ჩემი და რუსეთის პატრიარქის, კირილის შეხვედრის შემდეგ. ხელისუფლებამ არც ერთი ნაბიჯი არ გადადგა ამ მიმართულებით და დაბლოკა კიდეც საპატრიარქოს მცდელობა, რომ რუსეთის საპატრიარქოსთან გაეგრძელებინა მოლაპარაკება. თურქეთი ჩვენი სტრატეგიული პარტნიორი და მეგობარი ქვეყანაა, მაგრამ ის არის მაგალითი იმისა, როგორ უნდა დაიცვა შენი სახელმწიფოს ინტერესები და შენი რელიგიური ინტერესები. მიუხედავად იმისა, რომ თურქეთი საქართველოსადმი არის ძალიან კეთილგანწყობილი, ფრთხილად ეკიდება ნებისმიერ მცდელობას ქართული ეკლესიების აღდგენას თურქეთის ტერიტორიაზე. იმიტომ კი არა, რომ მათ ქართველები არ უყვართ ან მეგობრობა არ უნდათ, არამედ იმტომ, რომ ისინი იცავენ იმ მიკროგარემოს, რომელიც მათ ქვეყანაში არსებობს. ჩვენ გვყავს მუსლიმანი თანამემამულეები, რომლებიც ისეთივე პატივისცემას იმსახურებენ, როგორსაც ნებისმიერი ჩვენგანი. მათ უნდა ჰქონდეთ შესაძლებლობა, რომ წავიდნენ მეჩეთში და მოილოცონ, მაგრამ, რა თქმა უნდა, საქართველოს ინტერესებიც უნდა იქნას გათვალისწინებული. თუ არის საკმარისი მეჩეთები და ჩემი მონაცემებით არის, რატომ უნდა აშენდეს ახალი? ჩვენც უნდა ვიმოქმედოთ ისე, როგორც თურქეთი მოქმედებს. როცა დასჭირდა, მან გააუქმა ხელშეკრულება ცალმხრივად, ჩვენც ასე უნდა მოვქცეულიყავით. ჩვენ ყოველდღე ვხედავთ, რომ საქართველოს მთავრობა არ იცავს საქართველოს ეროვნულ ინტერესებს. ყველა ქვეყანა ჩვენთან ურთიერთობისას ახერხებს თავისი ინტერსების დაცვას, საქართველო ამას ვერც ერთ შემთხვევაში ვერ ახერხებს. ბათუმის თემას ხელისუფლება ძალიან ფაქიზად უნდა მოეპყრას. ყველა საკითხის მოგვარება შეიძლება ურთიერთშეთანხმებით.

– მას შემდეგ, რაც ივანიშვილი გამოჩნდა, პოლიტიკაში დაიწყო კონსულტაციები ცალკეულ პოლიტიკურ ორგანიზაციებთან, ნაწილის შესახებ ხდებოდა ცნობილი, ნაწილის შესახებ – არა. ვრცელდებოდა ინფორმაცია, რომ მას თქვენც შევხვდით და შემდეგ განაცხადეთ, რომ ეს არის ადამიანი, რომელმაც პოლიტიკა არ იცის. შედგა თუ არა შეხვედრა თქვენს შორის?

– ეს განცხადება ჰგავს ბატონ ბიძინას ერთ-ერთი წარმომადგენლის ნათქვამს, რომ ივანიშვილმა რამდენიმე რაიონში წინასაარჩევნო შეხვედრები გამართა. თქვენ გჯერათ, რომ ამ პატარა ქვეყანაში ისე მოხდა ეს ყველაფერი, რომ არავინ არაფერი არ იცის? რაც მთავარია, თავად დიდმა ვანომ არაფერი იცის? არ არის საჭირო ასეთი არასერიოზული განცხადებების გაკეთება. ჩემი შეხვედრა რომ შემდგარიყო ბატონ ბიძინასთან, არა მგონია, ეს დამალული ყოფილიყო. მე არ მითქვამს, რომ მან პოლიტიკა არ იცის, მაგრამ რეალურად რომ არ იცოდეს, რა არის ამაში დასაძრახი? ნუ მოვთხოვთ ნურავის, რომ ყველაფერი იცოდეს. მე არ მომეთხოვება, რომ ბიზნესი ვიცოდე ისე, როგორც იცის ივანიშვილმა. დარწმუნებული ვარ, ივანიშვილი ნიჭიერი ადამიანია და სწრაფად გაივლის იმ ეტაპებს, რაც საჭიროა კარგი პოლიტიკოსობისთვის. ნუ გვექნება მოლოდინი, რომ არიან ადამიანები, რომლებმაც ყველაფერი იციან და არაფერი შეეშლებათ.

– თქვენ აღნიშნეთ 44 რაიონული ორგანიზაცია ბიძინა ივანიშვილისა და ისიც ახსენეთ, რომ ისინი რეალურად არ არსებობს. უმალავენ ივანიშვილს ამ ყველაფერს?

– ამას, ალბათ, თავად ივანიშვილი გაარკვევს. მე ზუსტად ვიცი, რომ ჩვენი ორგანიზაციების წარმომადგენლებს ესაუბრებოდნენ ივანიშვილის სახელით და მათ ჩართვას ცდილობდნენ „ქართულ ოცნებაში“. მე არ ვფიქრობ, რომ ეს დავალება ბიძინა ივანიშვილისგან მოდის. ეს, ალბათ, ადგილობრივი ადამიანების აქტიურობაა. სასურველია, რომ ეს გაკონტროლდეს. ნამდვილად ვიცი, რომ ეს ორგანიზაციული სტრუქტურები არ არსებობს, ეს შეუძლებელიც იყო. ამას ვამბობ იმიტომ, რომ მან გადაამოწმოს ეს ინფორმაცია და არ დაეყრდნოს არარსებულ ორგანიზაციებს. რაც შეეხება იმას, ვინ ატყუებს, მგონი, ამხელა იმპერიის შემქმნელი შეძლებს ამის გარკვევას. მე არ ვაპირებ კრიტიკას, მაგრამ ვიტოვებ უფლებას, რომ ღიად ვისაუბრო მათ შეცდომებზე ან არასწორ ინფორმაციაზე, რადგან მიმაჩნია, რომ ივანიშვილი შეგნებულად არ მოატყუებს ქართულ საზოგადოებას.