ეკონომიკისა და მდგრადი განვითარების მინისტრმა ვერა ქობალიამ დღეს პრესკონფერენცია გამართა. საუბრის თემა ეროვნული ბიზნეს-დაჯილდოება "მერკური 2012" იყო, რომელიც მაისის პირველ ნახევარში საგამოფენო ცენტრ "ექსპო ჯორჯია"-ს ახალ პავილიონში გაიმართება.

საქართველოს ეროვნულ ბიზნეს-დაჯილდოვებაზე ყველა კომპანიას საკუთარი კანდიდატურა რამდენიმე ნომინაციაში შეუძლია წარადგინოს.

"ორგანიზატორების სურვილია, ეროვნული ბიზნეს-დაჯილდოება გამოირჩეოდეს ობიექტურობით და დახვეწილი შეფასების სისტემით, სწორედ ამ მიზნით, წელს შეფასების პროცესში ჩაერთო მსოფლიოს წამყვანი ბიზნეს გამომცემლობა Forbes-ი, რომლის საერთაშორისო ექსპერტებიც გვაძლევენ კონკრეტულ რეკომენდაციებს და გვიზიარებენ თავის მრავალწლიან გამოცდილებას. მერკურის ნომინანტების შეფასების პროცესში ასევე აქტიურად იქნება ჩართული კვლევითი ინსტიტუტი "ბისიჯი", - აცხადებს ვერა ქობალია.

წელს ბიზნეს-დაჯილდოების ნომინაციათა რიცხვს კიდევ 4 ახალი ნომინაცია დაემატა: "წლის უცხოელი ინვესტორი"; "წლის ქართველი ინვესტორი"; "წლის ტურისტული კომპანია"; "წლის ინოვატორი კომპანია".